Naf Ogaalka

 

Naf Ogaalka 

 Naf ogaalku waa fahamka iyo aqoonta qofku ka hayo naftiisa, iyadoo la eego aragtiyaha maskaxeed, dareen, iyo ficilada. Waa hab uu qofku ku baranayo isaga oo u kuurgalaya dareenkiisa gudaha, habdhaqankiisa, iyo awoodaha maskaxeed ee uu leeyahay. Naf ogaalku wuxuu ka qayb qaataa kobcinta caafimaadka maskaxda iyo jirka, iyadoo qofka ka caawinaya in uu si wanaagsan ula tacaalo duruufaha nololeed iyo isku filnaanshaha gudaha.

Naf ogaalku wuxuu qofka ka caawiyaa inuu fahmo wuxuu yahay iyo waxay tahay, rabitaankiisa, iyo waxa isaga ku dhiirigaliya. Tani waxay u fududeyneysaa inuu gaaro go'aanno wanaagsan oo la xiriira noloshiisa shaqsiyeed, midda shaqo, iyo xiriirada bulsho.

Naf ogaalku wuxuu sidoo kale ka caawiyaa qofka inuu si qoto dheer u fahmo dareenadiisa kala duwan, isagoo awood u leh inuu si wax ku ool ah u maareeyo walwalka, cabsida, murugada iyo farxadda.

Marka qofku naftiisa si fiican u fahmo, wuxuu si fiican ula macaamilaa dadka kale, isagoo heli kara habab wanaagsan oo isku xirnaan iyo isfaham bulsho ah.

 Naf ogaalku wuxuu qofka ku dhiirigeliyaa inuu is-beddelo oo naftiisa u kobciyo dhinacyada uu ka liito, isagoo horumar ka samaynaya xaaladaha maskaxeed iyo kuwa jireed.

Ka Fogaanshaha Naftaada: 

Dad badan waxay ka cabsadaan inay si dhab ah isku eegaan, taas oo keeneysa in aysan si dhab ah isku fahmin.  Bulshooyinka qaarkood waxay ku qasbaan shakhsiyaadka inay si qaldan u fahmaan naftooda iyagoo adeegsanaya heerar bulsho oo been abuur ah.  Haddii qofku ku jiro caadooyin qaldan oo aan dhiirigelinaynin kobcinta nafta, waxay ka dhashaa naf ogaal la’aan. 

Naf ogaal la’aantu waa xaalad qofka ku timaada marka uusan si wanaagsan u fahmin ama ugu baraarugsanayn naftiisa, dareenadiisa, iyo sababaha ka dambeeya ficilladiisa. Qofka naf ogaal la’aanta ahi wuxuu ku noolyahay xaalad aan la fahmin oo mugdi ah, taasoo adkeysa in uu si dhab ah u garto rabitaankiisa iyo waxa dhab ahaan noloshiisa muhiim u ah. Naf ogaal la’aantu waxay saameyn taban ku yeelataa dhinacyada kala duwan ee nolosha, sida caafimaadka maskaxda, xiriirka bulshada, iyo horumarka shaqsiyeed.

Naf ogaal la’aanta waxay ka timaadaa marka qofku uu si hoose u fahmo rabitaankiisa, awooddiisa, iyo dareenadiisa. Waxay keentaa in qofku aanu ogaan waxa run ahaantii noloshiisa muhiimka u ah iyo sida uu ku gaari karo hadafyadiisa.

Qof naf ogaal la’aan ah wuxuu ku dhibtoodaa in uu fahmo sida uu ula dhaqmo dadka kale, taasoo adkaynaysa xiriirada bulshada. Naf ogaal la’aantu waxay sababtaa isku dhac, fahmi waayo, iyo xiriirro aan waxtar lahayn. Marka qofku aanu si dhab ah u fahmin waxa uu dareemayo ama sababta uu ficilada qaar u sameeyo, wuxuu dareemaa walwal joogto ah iyo jahwareer, taas oo sii kordhinaysa culayska maskaxeed iyo midka jireed.

Naf ogaal la'aantu waxay saameysaa habka go'aan qaadashada, iyadoo qofku ku adkaanayo in uu gaaro go'aanno sax ah oo isaga anfaca. Tani waxay keeni kartaa inuu ku jahawareero dhinacyada kala duwan ee nolosha sida shaqada, waxbarashada, iyo xiriirada gaarka ah.